കൊച്ചി: പ്രശസ്‌ത വ്യവസായി ബോബി ചെമ്മണ്ണൂരിനെതിരെ സിനിമാ നടി ഹണി റോസ് പരാതി നൽകി. തനിക്കെതിരേ സ്ഥിരമായി അശ്ലീല ആക്ഷേപങ്ങൾ നടത്തുന്നു എന്ന് ആരോപിച്ചാണ് സെൻട്രൽ പോലിസിൽ പരാതി നൽകിയിരിക്കുന്നത്.
“ബോബി ചെമ്മണ്ണൂർ, താങ്കൾ എനിക്കെതിരെ തുടർച്ചയായി നടത്തിയ അശ്ലീല അധിക്ഷേപങ്ങൾക്കെതിരെ ഞാൻ എറണാകുളം സെൻട്രൽ പോലിസ് സ്റ്റേഷനിൽ പരാതി കൊടുത്തിട്ടുണ്ട്. താങ്കളുടെ തന്നെ മാനസികനിലയുള്ള താങ്കളുടെ കൂട്ടാളികൾക്കെതിരെയുള്ള പരാതികൾ പുറകെ ഉണ്ടാവും. താങ്കൾ താങ്കളുടെ പണത്തിൻ്റെ ഹുങ്കിൽ വിശ്വസിക്കൂ, ഞാൻ ഭാരതത്തിലെ നിയമവ്യവസ്ഥയുടെ ശക്തിയിൽ വിശ്വസിക്കുന്നു” -ഹണി റോസ് സമൂഹമാധ്യമത്തിൽ കുറിച്ചു.
ഇന്നു രാവിലെ കൊച്ചി സിറ്റി പൊലീസ് കമ്മിഷൺ പുട്ട വിമലാദിത്യയുമായി നടി കൂടിക്കാഴ്ച നടത്തിയിരുന്നു. നേരത്തെ മുപ്പതു പേർക്കെതിരേ നൽകിയ പരാതിയിൽ മൊഴി നൽകാൻ എത്തിയപ്പോഴാണ് ഇത്. പിന്നാലെയാണ് ബോബി ചെമ്മണ്ണൂരിനെതിരെയും പരാതി നൽകിയത്.
നാലു മാസം മുൻപ് നടന്ന ഒരു ഉദ്ഘാടന ചടങ്ങിനിടെ ബോബി ചെമ്മണ്ണൂർ നടത്തിയ പരാമർശങ്ങളെക്കുറിച്ച് വ്യവസായിയുടെ പേര് പരാമർശിക്കാതെ തന്നെ ഹണി റോസ് സമൂഹമാധ്യമങ്ങളിൽ കുറിപ്പ് പങ്കുവച്ചിരുന്നു. ഈ പോസ്റ്റിൽ കമന്റിട്ട 30 പേർക്കെതിരെയാണ് കഴിഞ്ഞ ദിവസം നടി പരാതി നൽകിയത്. ഇതിൽ കുമ്പളം സ്വദേശിയായ ഒരു യുവാവിനെ പോലിസ് അറസ്റ്റ് ചെയ്യുകയുമുണ്ടായി.ഇപ്പോൾ 31 പേർക്കെതിരെയാണ് ഹണി റോസ് പരാതി നൽകിയിരിക്കുന്നത്.
