ദുബായ് : യുഎഇയില്‍ സ്വന്തം പേരിലല്ലാതെ രജിസ്റ്റര്‍ ചെയ്ത വാഹനം ഓടിക്കുന്നതിന് നിയമപരമായ തടസ്സങ്ങളുണ്ടോ? അഥവാ സുഹൃത്തിന്റെയോ സഹപ്രവര്‍ത്തകന്റെയോ കാറെടുത്ത് യാത്ര ചെയ്താല്‍ പ്രശ്‌നമുണ്ടോ? അടിയന്തര സാഹചര്യങ്ങളില്‍ മറ്റുള്ളവരെ കാര്‍ ഓടിക്കുന്നത് പതിവാണെങ്കിലും ഇക്കാര്യത്തില്‍ യുഎഇയിലെ നിയമങ്ങള്‍ കൃത്യമായും അറിഞ്ഞിരിക്കേണ്ടത് നിര്‍ബന്ധമാണ്. സ്വന്തം പേരിലല്ലാത്ത കാര്‍ ഓടിക്കുന്നതില്‍ നിയമപരമായ തടസ്സങ്ങളില്ലെന്ന് ഒറ്റവാക്കില്‍ പറയാമെങ്കിലും ശ്രദ്ധിക്കേണ്ട ചില നിയമവശങ്ങളുണ്ട്.
കൂടുതല്‍ വാര്‍ത്തകളും അറിയിപ്പുകളും തത്സമയം അറിയുന്നതിനായി പോപ്പുലര്‍ ന്യൂസ് വാട്ട്‌സാപ്പ് ഗ്രൂപ്പില്‍ അംഗമാകൂ.. Click Here
2021ലെ ഫെഡറല്‍ ഡിക്രി നിയമം നമ്പര്‍ 31-ലെ ആര്‍ട്ടിക്കിള്‍ 447 പ്രകാരം, ഉമടയുടെ അനുമതിയില്ലാതെ മറ്റൊരാള്‍ വാഹനം ഡ്രൈവ് ചെയ്യുന്നത് കുറ്റകരമാണ്. ഒരു വര്‍ഷത്തില്‍ കൂടാത്ത തടവും 10,000 ദിര്‍ഹം പിഴയും അല്ലെങ്കില്‍ ഈ രണ്ട് പിഴകളിലേതെങ്കിലുമാണ് ഇതിന് നിയമം അനുശാസിക്കുന്ന ശിക്ഷ.
എന്നാല്‍ ഉടമയുടെ അനുമതിയോടെ വാഹനം ഉപയോഗിക്കണമെങ്കിലും ചില നിബന്ധനകള്‍ പാലിക്കണം. യുഎഇയില്‍ അംഗീകരിക്കപ്പെട്ട ഒരു ഡ്രൈവിംഗ് ലൈസന്‍സ് ഉണ്ടായിരിക്കണം എന്നതാണ് അതില്‍ പ്രധാനം. വിനോദസഞ്ചാരികളാണെങ്കില്‍ യുഎഇയിലെ ലൈസന്‍സോ അന്താരാഷ്ട്ര ഡ്രൈവിംഗ് ലൈസന്‍സോ വേണം. യുഎഇ ട്രാഫിക് നിയമത്തിലെ ആര്‍ട്ടിക്കിള്‍ 51 അനുസരിച്ച്, ഡ്രൈവിംഗ് ലൈസന്‍സില്ലാതെ വാഹനമോടിക്കുന്ന വ്യക്തിക്ക് മൂന്ന് മാസം വരെ തടവോ 5,000 ദിര്‍ഹം വരെ പിഴയോ ഇവ രണ്ടുമോ ലഭിക്കും. യുഎഇ റസിഡന്‍സ് വിസയുള്ളവരാണെങ്കില്‍ യുഎഇ ഡ്രൈവിംഗ് ലൈസന്‍സ് മാത്രമേ സ്വീകരിക്കൂ.
അതേസമയം, മറ്റൊരാളുടെ കാര്‍ ഓടിക്കുന്ന സമയത്ത് വാഹനം അപകടത്തില്‍ പെട്ടാല്‍, വാഹന ഉടമയുടെ ഇന്‍ഷുറന്‍സ് പോളിസി പ്രകാരം നാശനഷ്ടം ലഭിക്കണമെങ്കിലുമുണ്ട് നിബന്ധനകള്‍. യുഎഇയുടെ ഇന്‍ഷുറന്‍സ് അതോറിറ്റി നിശ്ചയിച്ച ഓട്ടോമൊബൈല്‍ ഇന്‍ഷുറന്‍സ് സംബന്ധിച്ച ഏകീകൃത പോളിസി അനുസരിച്ച്, മറ്റൊരാള്‍ വാഹനമോടിക്കുമ്പോള്‍ അയാള്‍ക്ക് കുറഞ്ഞത് ഒരു വര്‍ഷമെങ്കിലും പഴക്കമുള്ള സാധുതയുള്ള ഡ്രൈവിംഗ് ലൈസന്‍സ് ഉണ്ടായിരിക്കണം. എന്നു മാത്രമല്ല, ഡ്രൈവറുടെ പ്രായം 25 വയസ്സില്‍ കുറയാനും പാടില്ല. ഡ്രൈവറുടെ പ്രായം 25 വയസ്സിന് താഴെയോ ഡ്രൈവിംഗ് ലൈസന്‍സ് ഒരു വര്‍ഷത്തിനിടയില്‍ ലഭിച്ചതോ ആണെങ്കില്‍ തുകയുടെ 10 ശതമാനം വാഹനത്തിന്റെ ഉടമ നല്‍കേണ്ടിവരും. അതേസമയം, ഇന്‍ഷൂറന്‍സ് പോളിസി പ്രകാരം മറ്റൊരാള്‍ വാഹനം ഓടിക്കുന്ന സന്ദര്‍ഭങ്ങളില്‍ മറ്റെന്തെങ്കിലും നിബന്ധന വച്ചിട്ടുണ്ടെങ്കില്‍ അത് പാലിക്കപ്പെടണം.
