അബുദാബി: ഓണ്‍ലൈൻ പരസ്യങ്ങളിലൂടെ പണം തട്ടുന്ന സംഘങ്ങള്‍ യുഎഇയിൽ സജീവമായിരിക്കുകയാണ്. കാര്‍ വിൽക്കുന്നതിനുള്ള പരസ്യങ്ങള്‍ നല്‍കി തട്ടിപ്പു നടത്തുന്ന സംഭവങ്ങളും രാജ്യത്ത് റിപ്പോര്‍ട്ട് ചെയ്യപ്പെടുന്നുണ്ട്. ഇത്തരം കാര്യങ്ങളുമായി ബന്ധപ്പെട്ട് താമസക്കാര്‍ക്ക് മുന്നറിയിപ്പ് നല്‍കിയിരിക്കുകയാണ് അബുദാബി പോലീസ്. സോഷ്യൽ മീഡിയയിൽ വലിയ ഡിസ്കൗണ്ടുമായി പോസ്റ്റ് ചെയ്യപ്പെടുന്ന പരസ്യങ്ങൾ ഏറെ ആകർഷകമാണെങ്കിലും, ഇവ പലപ്പോഴും തട്ടിപ്പിനുള്ള കെണിയാണ്.
കൂടുതല്‍ വാര്‍ത്തകളും അറിയിപ്പുകളും തത്സമയം അറിയുന്നതിനായി പോപ്പുലര്‍ ന്യൂസ് വാട്ട്‌സാപ്പ് ഗ്രൂപ്പില്‍ അംഗമാകൂ.. Click Here
ഇത്തരം പരസ്യങ്ങള്‍ കണ്ട് ഉൽപ്പന്നങ്ങള്‍ വാങ്ങുന്നതിന് ഒരുങ്ങുന്നവര്‍ വിൽപ്പനക്കാര്‍ തട്ടിപ്പുസംഘങ്ങളല്ലെന്ന് ഉറപ്പാക്കണമെന്നും സാമ്പത്തിക ഇടപാടുകൾ അംഗീകൃത മാര്‍ഗങ്ങളിലൂടെ മാത്രം നടത്തണമെന്നും പോലീസ് നിർദ്ദേശിച്ചു. സോഷ്യൽ മീഡിയ പ്ലാറ്റ്‌ഫോമുകൾ വഴി നടക്കുന്ന കാർ വിൽപ്പന ഇടപാടുകളിൽ തട്ടിപ്പിനുള്ള വലിയ സാധ്യത നിലനില്‍ക്കുന്നുണ്ടെന്നാണ് അബുദാബി പോലീസ് ജനങ്ങള്‍ക്ക് നല്‍കിയ മുന്നറിയിപ്പ്. വാഹനം വാങ്ങുന്ന വ്യക്തികള്‍, വാഹനം ലഭിച്ചതിന് ശേഷം മാത്രമേ ഇടപാടുകൾ പൂർത്തിയാക്കാവൂ എന്ന് അധികൃതർ നിര്‍ദേശിച്ചു.
പണം നല്‍കിയതിന് തെളിവായി രേഖകള്‍ ഉണ്ടായിരിക്കുകയും വേണം. ആദ്യം നല്‍കുന്ന പണത്തിന് വ്യാജ സാമ്പത്തിക രസീതുകൾ നൽകുന്ന തട്ടിപ്പുകാർ കാര്‍ അവരുടെ കൈവശം തന്നെ സൂക്ഷിക്കുന്നതായും വാഹനക്കൈമാറ്റം നീട്ടിവെക്കുന്നതായും ചില റിപ്പോർട്ടുകൾ സൂചിപ്പിക്കുന്നു. അസാധാരണമായി കുറഞ്ഞ വിലയ്ക്ക് ആകർഷകമായ ഓഫറുകൾ നൽകിയാണ് തട്ടിപ്പു സംഘങ്ങള്‍ ഇരകളെ വീഴ്ത്തുന്നത്. വമ്പൻ ഓഫറുകള്‍ കാണുമ്പോള്‍ ആളുകള്‍ കെണിയിൽ വീഴാനുള്ള സാധ്യത ഏറെയാണ്. വാഹനം വിൽക്കുന്നതിനായി മാത്രമല്ല, വാഹനം വാങ്ങാന്‍ വേണ്ടി എത്തുന്നവരിലും തട്ടിപ്പുകാരുണ്ടാകാം.
പണം പൂര്‍ണ്ണമായും ലഭിക്കുന്ന സമയത്ത് വാഹനം കൈമാറുന്നതാണ് ഇത്തരം തട്ടിപ്പുകളിൽ നിന്ന് രക്ഷ നേടാനുള്ള മാര്‍ഗം. വിൽപ്പനക്കാര്‍ വിശ്വസ്തരാണെന്ന് ഉറപ്പുവരുത്തേണ്ടതിന്റെ പ്രാധാന്യത്തെ കുറിച്ച് പോലീസ് അധികൃതര്‍ ആവര്‍ത്തിച്ച് പറയുന്നുണ്ട്. തട്ടിപ്പിന് ഇരയാകാതിരിക്കാന്‍ വേണ്ടിയാണ് എല്ലാ സാമ്പത്തിക ഇടപാടുകളും അംഗീകൃത ചാനലുകൾ വഴി മാത്രം നടത്തണമെന്ന് അധികൃതര്‍ നിര്‍ദേശിക്കുന്നത്. ഓഫറുകള്‍ കണ്ട് പണം നല്‍കാന്‍ ധൃതി കാണിക്കരുതെന്നും ജാഗ്രത പാലിക്കണമെന്നും പോലീസ് ജനങ്ങളെ ഉപദേശിച്ചു.
ഗോഡൗണുകൾ, നിർമ്മാണ സ്ഥലങ്ങൾ എന്നിവയുടെ ഉടമകൾ സുരക്ഷാ ക്രമീകരണങ്ങൾക്ക് മുൻഗണന നൽകണമെന്നാണ് അബുദാബി പോലീസ് ആവശ്യപ്പെടുന്ന മറ്റൊരു കാര്യം. സുരക്ഷാ ഉദ്യോഗസ്ഥരെ നിയമിക്കുകയും അത്യാധുനിക സിസിടിവി ക്യാമറകൾ പോലുള്ള ടെക്നോളജി ഉപയോഗപ്പെടുത്തുകയും ചെയ്യണമെന്ന് ഇവരോട് പോലീസ് വ്യക്തമാക്കി. കുറ്റകൃത്യങ്ങൾ തടയുന്നതിലും പൊതുസുരക്ഷ വർദ്ധിപ്പിക്കുന്നതിലുമെല്ലാം പൊതുജനങ്ങളുടെ പങ്ക് വളരെ പ്രധാനപ്പെട്ടതാണ്. അബുദാബിയെ സുരക്ഷിതമായ നഗരമാക്കി മാറ്റുന്നതിനുള്ള പോലീസിന്റെ ദൗത്യത്തിൽ പൊതുജനങ്ങൾ പ്രധാന പങ്കാളികളാണെന്നും അവർ കൂട്ടിച്ചേര്‍ത്തു.
2025-ൽ ലോകത്തിലെ ഏറ്റവും സുരക്ഷിതമായ നഗരങ്ങളുടെ പട്ടികയിൽ അബുദാബി ഒന്നാം സ്ഥാനത്താണ്. 2017 മുതൽ തുടർച്ചയായി ഒൻപതാമത്തെ വർഷമാണ് അബുദാബി ഈ സ്ഥാനം നിലനിർത്തുന്നത്. ഓൺലൈൻ ഡാറ്റാബേസ് സ്ഥാപനമായ നംബിയോയാണ് കഴിഞ്ഞ ദിവസം ഈ റാങ്കിംഗ് പുറത്തുവിട്ടത്. 382 ആഗോള നഗരങ്ങളുടെ പട്ടികയിൽ ഒന്നാമതെത്തിയ അബുദാബി ഏകദേശം ഒരു ദശാബ്ദക്കാലമായി നംബിയോയുടെ ഏറ്റവും സുരക്ഷിതമായ നഗരമെന്ന പദവി സ്വന്തമാക്കുന്നുണ്ട്.
പുതിയ സുരക്ഷാ പദ്ധതികള്‍ വികസിപ്പിച്ചെടുക്കുന്നതിനും പൗരന്മാരുടെയും താമസക്കാരുടെയും സന്ദർശകരുടെയും ജീവിതനിലവാരം മെച്ചപ്പെടുത്തുന്നതിനുമായി അബുദാബി നടത്തുന്ന പ്രവർത്തനങ്ങളെയാണ് ഈ റാങ്കിംഗ് പ്രതിഫലിപ്പിക്കുന്നതെന്ന് അധികൃതര്‍ പറഞ്ഞു.
