മക്ക: ഹജ്ജ് കർമ്മം തുടങ്ങുന്നതിനായി മക്കയിലേക്കുള്ള പ്രവേശനം ഹജ്ജ് വിസ ഉടമകൾക്ക് മാത്രമായി പരിമിതപ്പെടുത്തിയതോടെ മതാഫ് ഏതാണ്ട് കാലിയായി. ഏപ്രിൽ 30 മുതൽ ഹജ്ജ് സീസൺ അവസാനിക്കും വരെ മക്കയിലേക്കുള്ള പ്രവേശനം ഹജ്ജ് വിസ ഉടമകൾക്ക് മാത്രമായി പരിമിതപ്പെടുത്തിയതിനാൽ ആണ് മതാഫ് (വിശുദ്ധ കഅബയ്ക്ക് ചുറ്റുമുള്ള വെളുത്ത മാർബിൾ കൊണ്ട് നിർമ്മിച്ച പ്രദക്ഷിണ സ്ഥലം) ഏതാണ്ട് കാലിയായത്. ഏതു സമയവും ആയിരക്കണക്കിന് വിശ്വസികളെക്കൊണ്ട് നിറഞ്ഞിരുന്ന മതാഫ് ശൂന്യമാകുന്ന ഒരു അപൂർവ ദൃശ്യത്തിന് ഇന്നലെ വെള്ളിയാഴ്ച സാക്ഷ്യം വഹിച്ചു. തീർത്ഥാടകരുടെ വരവിന്റെ ആദ്യ ദിവസമായ ചൊവ്വാഴ്ച, വന്നിറങ്ങിയ വിദേശ ഹജ്ജ് തീർത്ഥാടകരുടെ ഒരു ചെറിയ എണ്ണം മാത്രമേ വാർഷിക ഹജ്ജ് സീസണിന്റെ തുടക്കവും ഉംറയുടെ അവസാനവും അടയാളപ്പെടുത്തുന്ന ദിവസം തവാഫ് അനുഷ്ഠിക്കുന്നതായി കാണപ്പെട്ടുള്ളൂ.
ഏപ്രിൽ 29 മുതൽ വാർഷിക ഹജ്ജ് തീർത്ഥാടനം അവസാനിക്കുന്നതുവരെ ഹജ്ജ് വിസയില്ലാത്തവർക്ക് മക്കയിൽ തങ്ങുന്നതിന് വിലക്ക് ഏർപ്പെടുത്തിയതാണ് ഇതിന് പ്രധാന കാരണം. നിരവധി രാജ്യങ്ങളിൽ നിന്നുള്ള തീർത്ഥാടകർ അവരുടെ ജീവിതകാല ആത്മീയ യാത്രയ്ക്കായി പുണ്യനഗരത്തിലേക്ക് ഒഴുകിയെത്താൻ തുടങ്ങുന്ന വരും ദിവസങ്ങളിൽ ഗ്രാൻഡ് മോസ്കിൽ വിദേശ തീർത്ഥാടകരുടെ എണ്ണത്തിൽ ക്രമേണ വർദ്ധനവുണ്ടാകും. 2025 ലെ ഹജ്ജ് സീസണിൽ മക്കയിൽ ഹജ്ജ് വിസയില്ലാത്തവർക്ക് താമസ സൗകര്യം നിരോധിക്കാൻ സൗദി അധികൃതർ നിർദ്ദേശങ്ങൾ പുറപ്പെടുവിച്ചിട്ടുണ്ട്.
