മലപ്പുറം: ചാർജ് ചെയ്യുന്നതിനിടെ ഇലക്‌ട്രിക് സ്കൂട്ടർ കത്തി നശിച്ചു. വളാഞ്ചേരിയിലാണ് സംഭവം. വളാഞ്ചേരി സ്വദേശി സൈഫുദ്ദീന്റെ സ്കൂട്ടറാണ് കത്തിനശിച്ചത്.ഇന്ന് രാവിലെ 3.15 നായിരുന്നു സംഭവം. മൂന്ന് വർഷം പഴക്കമുള്ള സ്കൂട്ടർ ആണ് തീപിടിച്ചത്. സ്കൂട്ടറില്‍ നിന്നും വീടിന്റെ മുൻഭാഗത്തേക്കും തീ പടർന്നു. സാധാരണ രാത്രി പത്തുമണിയോടെ ചാർജ്ജിലിട്ടാല്‍ പുലർച്ചെ 4 മണിയോടെ ഓഫ് ചെയ്യാറുണ്ട്. എന്നാല്‍, ഇന്നലെ പുലർച്ചെ മൂന്നുമണിയോടെ ശബ്ദം കേട്ടാണ് ഉണർന്നത്. പൈപ്പ് വെള്ളം ഉപയോഗിച്ച്‌ തീയണച്ചു.
വണ്ടി നില്‍ക്കുന്ന സ്ഥലവും നശിച്ചുപോയിരുന്നു. ബാറ്ററിയുടെ ഭാഗത്തായിരുന്നു തീയുണ്ടായിരുന്നത്. അത് പിന്നീട് പരക്കുകയായിരുന്നു. പെട്ടെന്ന് കണ്ടതോടെ തീയണക്കാൻ കഴിഞ്ഞത് വലിയ നാശനഷ്ടങ്ങള്‍ ഒഴിവാക്കി. സൈഫുദ്ദീൻ കച്ചവടത്തിനായി വാങ്ങിയ വാഹനമാണിത്. അങ്ങാടിപ്പുറത്ത് നിന്നാണ് കൊമാക്കി കമ്പനിയുടെ ഇലക്‌ട്രിക് സ്കൂട്ടർ വാങ്ങിയത്.
